حالة ميدان

ترى لو افقئ عينيك.....واضع مكانهما 500 جنيه معاش (زى المجلس ما قال ) .....أترى ؟؟؟ أترى؟؟؟؟؟

الإسلام مش عبد المنعم الشحات.... والمسيحية مش نجيب ساويرس.....والحرية مش علياء المهدي....وانا مش انا يا دكتور

الى من يغفل الامر : القبض على النشطاء السياسين..... كالقبض على الجمر بأديك الاتنين

الحكم النهائى والأبدى : يبقى الحال على ما هو عليه وعلى المتضرر اللجوء للميدان

حالة انتخابات مصر

هناك مخطط ناسوانى (ماسونى ) خطير:السيدات ينتخبن الاسلامين عشان ازواجهم مايلقوش ستات برة يبوصوا عليهم وليجلسن ف البيت وليعمل الراجل وسلملى على الانتخه

المرشحين للمناصب لا يستحقون عناء الذهاب لمرة واحدة فما بالكم لو فى إعادة

سؤال مهم : هو المناخ الانتخابى السلمى دة يبقى ابن عم وثيقه السلمى ؟؟!!

مبروك لكل المصرين فوز الديمقراطيه على الثورة ونحن نأمل فى جولات اخرى قادمه تكون نتيجتها التعادل (الاجتماعى) اللى عمالين يقولوا عليه دة

عبد المنعم الشحات هو مينا عصر الانتخابات ....هو من استطاع توحيد كل طوائف مصر- إلا من السلف - ضددة فى الانتخابات

بعد نتائج مصر الجديدة ومدينة نصر وفتح باب الهجرة : انا موطن مصرى الجديدة وليا حقوق نصريه

أعلن مهبول من نواحيكوا

أعلن مهبول...من نواحيكوا

ان المجلس.. باض وهيفقس

لازم يفقس فى ميعادة

ان شالله يموت كل ولادة

وان المجلس لازم يقعد

علشان البيض مش علشانه

اصل البيض يا اخوانة

عاوزين حد عليه يرقد

يرقد يعنى هيرقد
 باطول راح يرقد او بالعرض

أعلن مهبول...من نواحيكوا

الداخليه .... دى وليه

محتاجه منكوا الحنيه

والداخليه .....ماليهاش حارس

والعين اللى عليها حارس

.....اللى فقعها كان حارس

والروح اللى قبضها حارس

................اسمائهم مش موجودة فى كشوف القبض

سئل المهموم من نواحينا

هو اللى فى راسكوا دة ايه؟

يا سعادة البيه

يمكن بيبيه !!!!!

مهو مش ممكن يبقى دة مخ

العيب مش فيكم .. د ف اهليكيم

يوم ما جبوكم .... ما قلوش ليكم

دم اعدائكم دح .. ودم احواتكم كخ

طب هيجلكوا منين المخ

.....رد المهبول من نواحيكم

ان الداخليه ....ما فيهاش اصلا ولا واحد راس

واللى شايفنوا دة راس

مش راس ... دة شىء لامؤخذة بيشخ

والفرق كبير .... بينا وبنكم

....................الفلق بتاعكم بالطول والفلق بتاعنا بالعرض

صرخ المهموم من نواحينا

مش عارف اقول اللى ف نفسى

وكلامى كاتم على روحى

مشكلتى يا ناس انى مؤدب

وسلوكى بتغرس فى جروحى

ايه اللى بيحصل لبلادى؟؟!!!!

دم ولادى ... بقى شىء عادى... من كتر ما بيسيل ع الارض

جرى ايه يا حكومه يا وسخه يا نتنه يا جايفه يا بنت الكلب

هو انت يا دخليه ما فيش عندك ريحه ام القلب

عقب مهبول من نواحيكم ان الداخليه ... ما بتسمعش ولا تعرفش ولا تفهمش النبض

حالة فول مستشرى

دورت ف كل برامج 
       الانتخابات الحــزبيه

مالقيتش فيهم ولا واحد 
      بس يعبرعن 100%

ماطلعتش سلفى 
ولا اخوانى ولا علمانى
     ولا حتى من الليبراليه

امال انا ايه؟؟انا خلطه من 
         النكهات المصريه

فى مصر

فى مصر

القهر , الذل , الظلم , الفساد والبهدله كل دول زيهم زى الشتيمه

تلف تلف وترجع لصاحبها

حالة عزائى لمن مات من الشهداء ومن يموت ومن سيموت

الشعب قال كلمته ...... ملوش مكـان فيها
عمال يمد فى مدته .... هيعش يمـوت فيها
يا عم ركز بقى ...... داحميها حرامــيها
والى صحيح حبها ...... هو اللى مات فيها

حالة حكام مصر فى اى وقت

اسمــــع كلام الثورة وارحـل يا غبى ..... الليل بيرحل للنهار

دم الشهــــيد لما بينزف ع الرصيف يرســم ملامح الانتصار

اياك تكون فاهم هننســـى ..... لاء د اصبح بينا طــــــار

دم اللى مات ...غرق مركبك... لما ابتديت وضــــربت نار

الظلم طال..عربات بتهرس ف العيال..مين اللى قال ينفع حوار

هو انت فاكر كل مصرى ...بعد اسمه ف البطاقه بين قوسين مكتوب (( حمار))!!!!ا

حالة مصر

قد ضاجعوكى دم ................ اتباع مولانا

لما يجينا الدور ................... قولتيلنا تعبانا

حلال عليهم هم ..... حراما لمن عانى؟؟؟

طب ترفضينا ليه ..... لما انت شرقانا؟؟؟؟؟

حالة حر

البعد صعب صحيح والقرب جمرة نار

وانا مابين الماضى والحاضر بعيش محتار

وبكرة ذى البلد دى جوها مولع نار

يا سلام لو يعملوا للحياة تكييف

بس اللى يفقع بقه انه ملوهشى زرار

حالة برص (ذكر البرصه )

ليه الشاعر الحساس

حقه ضايع بين الناس

وكل ما سهمه بيعلى لفوق

ديما يضرب تانى افلاس

حالة تنفيض

بنام واصحى على حبك

يخبط بابى افتحلك

الاقى الصبح لسه ماجاش

انام تانى ونففضلك

حالة هم

ليه الواحد كل ما يجى يقوم من نومه

يلاقى الحزن ف قلبه بيكبر يوم عن يومه

يغسل وشه ويغير لبسه وينزل شغله

يرجع بيته..... همه يزيد ......فينام بهدومه

حالة قذارة عامة

كان زمان المناضل ......فقير , مطحون , مبهدل فى منظرة و كثيرا ما يكون لبسه قذر

اما الان المناضل ...... انواع كتير واسماء اكتر .. ناشط , حقوقى , فلوطه الشىء الوحيد المشترك ان يكون لسانه قذر