حدث بالفعل

فى المكان دا من سنة

زى الكابوس كانت هنا

كنت قاعد ويا واحدة

 قلبها مليون ملاك

قالت الرعشه ف لسنها

خد فى ايدك دبلتك

سكتى مش سكتك...

قالت الدمعة ف عنيها

مش عشان الدبله فلسوا

لاء عشان دى حبتك ...

قمت عامل نفسى دبلة

كنت زى حبيبة حبلة

رامية روحها ونفسها

كنت كاسر قلبى ؟!

ايوة!!

اصلى كنت بحبها...

حتى اخر نقطة فضلت م الكرامة

كل كلمات الملاطفة والملامه

كل حاجة بتبعدك كان مفترض 

ترجعك

كنت شايفها ف عينيكى يا حبيبتى 

بتوجعك ...

كنت جو الكادر يعنى

كنت مش شايف حقيقى

يعنى اية عاوزة تسبنى

أو طريقها غير طريقى

واما جت سيرتى ف كلامها

قلبها وف لحظة خانها

قالت الكلااااااام دا كله 

فى النهاية "باى حبيبى"

بعد كام شهر اتقابلنا

هى كانت هى هى

آية صارخة فى الجمال

كنت بره الكادر شايف 

فاكتشفت ف لحظة واحدة

رد يخرس ميت سؤال 

كنت قاعد ويا واحدة

حبها كان ليا صادق

بس شغلتها شمال ...

صدر ديوان بزق فـ الأيام - أحمد الحديدى - موجود بمعرض القاهرة الدولى للكتاب صالة 3 جناح دار روعة للنشر وقريبا بكل مصر

لعب خليفه

مين اللى مانع القصيده

م الخروج

         حشرها فى ذورى
طعم المعانى ملح صافى
وانا اللى مانعنى من الملح المرض

            بأمر دكتورى

(١)

كنَّا لِعَب

من بين لعب ابن الخليفه
لعب علينا كام سنه
ألعابه لسه معلمه
لِعِب لحد ما تعب
لِعِب و فى الاخر هِرب
هرب الخليف مع الخليفه
حتى اللعب بيجيها يوم

              تصبح مخيفه   

(٢)

ممكن تقولى اذاى
واحنا فى زمن العجب
تحكم لعب ؟؟!!!!

ممكن تقولى اذاى
تأمر حزين يعزف نغم

       ترقص عليه ؟؟!!!
إذاى
تأمر حزين يعزفلك اللحن اللى يفرح
وهو ماسك ناى ؟!!!
إذاى

اذاى يكون القلب واحد

 والجسد مقسوم؟؟!!
اذاى يكون الحن

طالع من مقام الصبا
بس الايقاع مقسوم ؟!!!

(٣)

بعد الصراع  ع السلطه

 والهبل الكبير
قلنا ندى اللعب

حق تحديد المصير

معلش فى ألعاب كتير

لا تحترم
بالسخرة تحفر قناه
بالسخره تعمل هرم

ايوه الهرم إعجاز
والعجز فى بنائه
ديما يكون المرض

 متعبى فى دوائه

(٤)

الرفق باللعب

وجب نعمله جمعيه
وبعد ما غرق الوطن فى الدم
واليوم صبح

  صيد الحرس غيه
تعالوا نعمل للشعوب

    محميه طبيعيه

(٥)

اذاى هيحكمنا ابن حنبل

واحنا احفاد الحنيفه

اكيد هترجع اللعب

 لخير أجناد الخليفه **

** خير اجناد الخليفه أسم ديوان للشاعر مصطفى حسان

بزوق ف الأيام

عايش حياتى كلام

بزوق ف الأيام
بافطر بأحلامى
واتعشى برجولتى
وقت النهار بتمنى اموت
         وف ليلى اموت وأنام
عايش حياه بزوق ف الأيام

حته خشب عايم أنا ع الموج
مره يجبنى يمين
مرة يجبنى شمال
عايش لعل وعسى لغير أكون شيال
الحلم عفر ع السنين بهجه
الزويه لو حاده
أضلاعها منفرجه
الحلم زى البنت فى ليله جواز
عروسه من غير زوج
وانا يادوب
حته خشب وعايمه فوق الموج

بعافر الزمن واعانده بالكسل
بقلِّب الماضى ف بكرة
و احلى فنجانى بذِكره
واعد ف الأيام
يوم مر يوم تانى عسل
بعافر الزمن واعانده بالكسل

باحاول اهرب منى أو من أى قيد
والعن أبو العاده على التقاليد
أحب أقرا الفلك
نجومه مش غيبه
واحب تربية السمك
واكره قوى صيده
إزاى تكون خاين وتبقى سعيد
ملعون أبو العاده على التقاليد

يركبنى عفريت القصص

اللى مانيش فيها
واتعبد المعنى اللى ساكن

 فى قصيده بنت
مش عارفه تلقيها
وآه مِنِ المعانى بكر

لمَّا بتدّلدء من الحروف جمل

دافيه
وآه مِنِ العيون

جمال لا يحتمل

 صافيه

عقلى تعب منْ توهِةِ التفكير
وصابنى ميت كافيه
اليأس بحر غويط ومر
لكن أكيد نقطه أمل

كافيه
وانا اللى متعود على طعم الألم

قدرى
أحاول اضحك على الألم بالليل

وانام بدرى
واخاف قوى ليجينى ف الأحلام
عايش حياه بزوق ف الأيام

كفن

الرب واحد يا بشر
بس الوطن مقسوم
يارب لما أموت
يكفنونى هدوم

احنا اللى سطر الكلام آساطير خرافيه
احنا اللى حكِّينا
.......واحنا اللى ألفنا
احنا اللى غنينا
......... وصوتنا خوفنا
ولما أخرجنا الڤيناله جت حقيقيه

مين اللى كان يقدر يقول
بارليف نعدى منه عادى ونخرمه
احنا اللى أثبتنا البقاء للى خلق
............ والأقوى لازم نكسره
احنا اللى عبِّينا الميدان ملاين بشر
لجل إن واحد مش عاجيبنا قولنا يالله نغيره

اجددنا لما فكروا يعبروا عن نفسهم
بنوا الهرم
بس اما حبوا يعبروا عن عجزكم
قلبوه كفن

الرب واحد يا بشر
بس الوطن مقسوم
يا رب لما أموت
يكفنونى هدوم

استرضاء

صفق لمن لا يستحق ..... لعلهم يصفقون له بحق

ذاتيه

عاش لنفسه فقط ...... ومات من الملل